Astana Cycling Team

 Есімі велоспорт әлеміне кеңінен танымал Қазақстан дүлдүлі Андрей Кашечкин «Астана» сапына қайта оралды.

Дүйсенбі күні Монакода «Астана» клубы арнайы баспасөз мәжілісін өткізді. Онда Андрей Кашечкиннің Қазақстан клубы сапын толықтырғандығы мәлімденді. Андрей 2010 жылдың екінші жартысында Италияның Lampe клубымен келісім-шартқа отырған. Негізгі мақсаты биылғы «Тур де Франс» көпкүндігінде бақ сынап, осы аламан бәйгеде өзінің деңгейі жо­ғары дүлдүл екендігін дәлелдеу еді. Алайда Италия клубы, негізінен, өз елінің вело­шабандоздарына мүмкіндік беріп, соларға жағдай жасап, Кашечкин тасада қалып қойды. Сондықтан Андрей өз елінің велоклубына қайта оралды. Ол Қазақстанның брендіне айналған велоклубпен 2013 жылға дейін келісімшартқа отырыпты. «Астана» клубының баспасөз қызметі таратқан ақпараттарға сенсек, биыл­ғы жылдың аяғына дейін көк тиын да алмай, тегін өнер көрсетпек. Ал оның Lampe клубымен қалай есеп айырысқаны әзірше ашық айтылмай отыр. Мұнымен Кашечкиннің адвокаты айналысып жатқан сыңайлы.

«Астана» клубы жаңадан құрылған кез­де, яғни 2006 жылы осы ұжымның се­нім артар серкелерінің бірі болған Ка­шеч­кин өз елінің командасына қайта орал­­ғандығына дән риза. Бұл орайда ҚР вело­спорт феде­ра­циясының президенті Қай­рат Келімбетов пен «Астана» клубы бас­шыларына дұғай-дұғай алғыс жолдау­да.

– Он үш жыл Еуропада тұрамын. Бірақ сонда мен Қазақстан спортшысы болып қала беремін. Өз елімнің намысын қорғау туралы ой ешқашан жадымнан шыққан емес. Сондықтан Lampe клубымен арадағы келісімшартты үздім. Енді өз Отанымның намысын жыртуға дайынмын. Бұл – менің патриоттық борышым. Мен мұндай мүмкіндікті ұзақ күттім. Қазір мен спорттық бабымдамын. «Тур де Франсқа» қатыса алмағандықтан, күш-қуатымның бәрі сақталды. «Вуэльтада» алғашқы бестіктен көрінуге тырысамын. Өз еліме жеңіс те сыйлағым келеді. Енді менің уақытым жетті, енді менің дәуірім басталды деп ойлаймын. Қазақстан Туы астында өзімді көрсетуім керек, – деп ақтарылыпты Андрей Кашечкин.

Ал өз өміріндегі допингіге қатысты келеңсіздік жайында «жанымды уа­йым мен қайғы басқан сол күндерде де бос отырмай, еңбектендім, тіпті филосо­фия­лық ілімдер мен әдебиеттерді көп оқып, жан дүниемді байыта түстім» депті.

Естеріңізге сала кетейік, Андрей Кашечкин – Қызылорда тумасы. Қазір 31-де. Нағыз тәжірибесінің толысқан кезі. Өз ке­зегінде «Астана» клубының бас­шы­лары Андрейге үлкен сенім артып отыр. «Тур де Франс» көпкүндігіне бар­ғаны­мыз­да, «Самұрық-Қазына» әл-ауқат қорының басқарушы директоры Дархан Қалетаев:

– Тамыздың 1-і күні өз клубымыздың сапын деңгейі жоғары бір велоспортшымен толықтырамыз. Кім екенін сол кезде білетін боласыздар. Ол команда капитаны болады. Мақсатымыз – «Вуэльта» көпкүндігінде топ жару. «Тур де Франс» көпкүндігендегі сәтсіздіктің орнын толтыруымыз керек, – деген-ді.

Ендеше, «Астананың» Испания көп­күндігінде сенім артар серкесінің Андрей Кашечкин болуы да мүмкін. «Вуэльта» додасына «Джиро» мен «Тур де Франсқа» қатысып, титықтаған арынды да дарынды веложұлдыздар қатыса алмайды. Яғни Кашечкин секілді бағы ашылмай жүрген саңлақтардың көсіле сілтер сәті.

Осы ретте, «Астана» клубының қазіргі басшыларын «ұлттық құрама мен өз отандастарымыз туралы көп ойлайтын көздері ашық, көкіректері ояу азаматтар» деуге әбден болады. Бұл тұрғыда «Астана» вело­клубының коммерция­лық директоры, Кашечкинді «Астанаға» қай­тарумен тікелей айналысқан Айдар Махметовтің сөзіне көңіл аударғанымыз артық етпес:

– Андрей Кашечкин – «Астана» клубы құрылғанда Александр Винокуровпен бірге осы команданың арна тартқан көзінде тұрған дүлдүлдеріміздің бірі. Сондықтан оның өз клубымызға қайта оралуы – орынды және қуанышты жайт. Команда қиын кезеңді басынан кешіп, Винокуров қатардан шығып қалғанда, қайтадан өз ортасына оралып, жігіттерді жігерлендіруге келді. Ал біз «Астана» сапына еліміздің ең үздік велоспортшыларының бәрін жиюды қалаймыз. Кашечкинді қай­та шақыртуымыз – Қазақстан ұлттық құра­масын жасақтау барысындағы маңызды қадамдарымыздың бірі.

Автор: Нұрғазы Сасаев

Алаш айнасы