Astana Cycling Team

Австралияда тас жолдағы веложарыстан әлем чемпио­наты аяқталды. Ерлер ара­сын­дағы аламан бәйгеде Асан Базаев сегізінші орынға ие болып, көңілімізді марқайтты.

Асан кейінгі кездері көзге түспей кетті десек, яғни көңілге қонымды нәтиже көр­сет­пей жүрді десек, артық айтқандығымыз болмас. Неліктен екені белгісіз, әйтеуір, болашағынан зор үміт күткен вело­ша­бан­до­зымыздың бағы жанбай жүрген-ді. Әлде «Астана» клубының менеджерлері мүмкіндік бермей жүр ме, жоқ әлде Конта­дор­дың көлеңкесінде қалып қойып, сағы сынып жүр ме, белгісіз... Сол Асан «Жасыл құрлықтағы» әлем чемпионатының аламан бәйгесінде 8-орынға ие болып, иісі қазақ­ты қуантты. Қуанбағанда ше?! Ұдайы шетел жұлдыздарының жетістіктеріне иек ар­тып, соларға табынғандай күй кешуден жалық­қан да сияқтымыз...

262,7 шақырымға созылған аламан бәйгеге 180-ге жуық кәсіби велоспортшы қатысқан болатын. Бәрі де – өз елдерінің үкілеп қосқан үздіктері, сенім артқан серкелері. Алайда солардың 99-ы ғана көмбеге жетті. Жартысына жуығы ғана осы алыс жолға шыдады. Тіпті Марк Кавендиш, Санчес секілді тәжірибелі тарланбоздардың өздері сәтсіздікке ұшырады. Өкінішке қарай, біздің де кейбір вело­ша­бан­доз­да­ры­мыз көмбеге жете алмады. Олар: Вален­тин Иглинский және Сергей Ренев. Бағы да, бабы да қатар шапқан норвег дүлдүлі Тор Хушовд болды. Дат жігіті Матти Бре­шиль екінші орын алса, «Астана» клубының мүшесі, Австралия спортшысы Аллан Дэвис қола жүлдеге қол жеткізді.

Асан сияқты Дмитрий Фофонов та бар­ша­мызды қуантып, 12-орынға ие бол­ды. Ал Александр Дьяченко 88-орынды қана­ғат тұтты. Естеріңізге сала кетейік, Фофо­нов жеке жарыста да ел намысын абы­рой­мен қорғап, осыдан бірнеше күн бұрын 22-орынға ие болған болатын.

Әйелдер арасындағы 127,2 шақы­рым­ға созылған аламан бәйгеде біздің елдің аты­нан жарысқа түскен Наталья Стефанская 60-орынмен шектелді.

Алаш айнасы